Paagi sa Executive Order No. 010, Series of 2025, ginpabakod ni Mayor Raisa S. Treñas ang kampanya batuk sa pagpanigarilyo kag paggamit sang ‘vape’ sa syudad pinaagi sa pagreconstitute sang Iloilo City Anti-Smoking Task Force (ICAST) kag pagdeputize sang mga enforcers sini.
Sa interview sang Bombo Radyo kay ICAST Director Iñigo Garingalao, iya ginpahayag nga positibo kag angay gid sa tiun ang mando ukon adbokasiya ni Mayor Raisa, nga nagapakita sang matuod-tuod nga pagtutok sini sa ikaayong-lawas sang mga Ilonggo.
Ginpahayag man ni Garingalao nga ang pag-issue sang EO naga-‘underline’ gid sang seryoso nga tinutuyo sang alkalde nga padayon nga panindugan ang kampanya batuk sa passive smoking, ilabi na para sa kabataan kag vulnerable nga sektor.
Ginklaro man sang EO ang awtoridad sang ICAST agents nga magadakop kag maga issue sila sang citation tickets sa mga magalapas, kag ginapanawagan ni Mayor Raisa ang bug-os nga kooperasyon sang publiko para sa isa ka mas himsog kag ‘smoke-free’ nga Iloilo City.
