Nagpangabay ang National Police Commission (NAPOLCOM) Regional Office 6 sa publiko nga likawan ang pagpalapta sang mga espekulasyon samtang wala pa matapos ang opisyal nga imbestigasyon may kaangtanan sa kaso sang isa ka pulis nga nasapwan-patay sa sulod sang Barotac Nuevo Police Station.
Sa interview sang Bombo Radyo kay Atty. Michelle Yotoko, spokesperson sang Napolocom 6, iya ginpahayag nga kinahanglan hulaton ang resulta sang ginahimo nga imbestigasyon sang Special Investigation Team sang Iloilo Police Provincial Office.
Ginhingyo man sang nasambit nga opisina ang publiko kag tanan nga mga concerned sectors nga indi maghimo-himo sang kaugalingon nga konklusyon kaangay sang presumption sang suicide ilabi na nga napadayon pa ang opisyal nga imbistigasyon.
Bilang oversight body sang Philippine National Police, ginpahayag ni Yotoko nga padayon nga ginamonitor sang NAPOLCOM ang developments sa kaso kag magapadayon sila sa ila commitment sa integridad sang police operations.
Dugang pa, ginpabutyag man sang NAPOLCOM 6 ang ila suporta sa kampanya sang PNP para sa pagpasangkad sang mental health awareness.
Ini ang ginalakipan sang mga programa nga naga-promote sang regular psychological evaluations, stress debriefings, wellness activities, kag ang pagduso sang kultura sang strength and responsibility sa sulod sang organisasyon.
Sa ginpagwa nga press statement, nagpalab-ot sang pagpakig-unong ang NAPOLCOM-6 sa pamilya, mga abyan, kag mga kaupdanan sa trabaho sang napatay nga pulis.
Matandaan nga nasapwan ang biktima nga si Police Staff Sergeant Richard Velez, 36, nga wala na sang kabuhi sang Hulyo 9, sa diin may igo ini sang bala sa natuo nga bahin sang iya ulo.
