Ginkalipay sang Iloilo City General Services Office (GSO) ang pag-ugyon sang mga pumuluyo sa pinakauna nga pagtigayon sang city-wide clean-up drive subong adlaw, Hulyo 12.
Ini nga lihok ang ginpangunahan ni Iloilo City Mayor Raisa Treñas.
Ang aktibidad ang kabahin sang padayon nga kampanya batok sa baha, kag dengue.
Sa interview sang Bombo Radyo kay Engr. Niel Ravena, hepe sang GSO, iya ginpahayag nga nag-deploy sila sang mga truck kag mga street sweepers sa kada distrito sang syudad.
Gin-assignan ang tagsa ka barangay sang lugar nga ila pagatinluan, sa koordinasyon sang mga barangay officials.
Suno kay Engr. Ravena, ginahatagan nila sang prayoridad ang mga barangay nga may pinakamataas nga kaso sang dengue.
Lakip diri ang inspeksyon sang drainage system, drain holes, kag ang pagpanglimpyo sang mga lugar nga may uncollected garbage.
Dugang pa niya, ginpahanumdom niya ang mga assigned personnel nga dapat e-clear gid ang mga drainage system para indi magbaha, kag masiguro nga matalunsay ang ilig sang tubig sa mga waterway.
May Nakatalana nga regular nga schedule ang programa kada Huwebes kag Sabado, kag gina-monitor ini sang GSO para masiguro nga epektibo ang implementasyon.
Ang City Government sang Iloilo nagapanawagan gihapon sa publiko nga magpadayon sa pagsuporta kag partisipasyon sa mga aktibidad para sa kaayuhan sang syudad.
