Gindugukan sang madamo nga tawo ang ginhiwat nga Market Draw subong nga adlaw, Hulyo 12 sa Arevalo Public Market, kabahin sang padayon nga promo nga “Swerte sa Palengke 2025” sang Star FM kag Bombo Radyo.
Nagtipon ang mga participante halin sa nagkalain-lain nga lugar, dala ang ila paglaum nga magdaog sang mga premyo sa raffle draw kag iban pa nga pa-indis-indis.
Kabahin man sang programa ang mga parlor games, lakip na ang Video Challenge nga ginpasakupan sang mga tumalan-aw kag ginkalipay sang kadam-an.
Isa sa mga aktibo nga participante amo si Elsie Sampanie, nga gin-interview sang Bombo Radyo.
Suno sa iya, dugay na siya naga-apil sa nasambit nga promo, kag subong nga adlaw personal gid siya nagpadulong sa Arevalo Public Market agud isumiter ang iya mga proof of purchase isa sa mga kwalipikasyon para makasulod sa promo.
Apisar nga wala sang upod ang iya nagamasakit nga bana sa ila balay, naghimakas gid ini nga magkadto bangud nagalaom ini nga magdaog.
Padayon ang kampanya sang “Swerte sa Palengke 2025” bilang isa ka inisyatibo nga nagahatag sang kasadya, paglaum, kag inspirasyon sa mga pumuluyo, labi na sa nagapadayon sa pagsuporta kag partisipasyon sa programa.
