Ginpasalig sang Sugar Regulatory Administration (SRA) nga indi maapektuhan ang presyo sang kalamay sa masunod nga mga binulan apisar sang anunsyo nga maga-import ang gobyerno sang Pilipinas sang 424,000 metric tons sang refined sugar.
Suno kay SRA administrator Pablo Azcona, stable lang ang presyo sang kalamay sa merkado nga yara sa P85 sa nagligad nga tatlo ka tuig. Nagapaninguha suno sa iya ang gobyerno agud nga mapabilin lang dira ang retail price.
Sang 2024 suno sa opisyal, nagnubo ang presyo sang brown kag washed sugar, apang sa sitwasyon subong, maayo gid para sa farmers bangud nagsaka ang farmgate kag millgate price sini, kag pabor naman para sa consumers bangud nagnubo ang retail price sang brown kag washed, samtang stable naman ang refined.
Ginsulit man sang ahensya nga ang iga-import sang Pilipinas amo ang makabulig para sa supisyente nga suplay sang kalamay para sa domestic consumption kag buffer stock.
Dugang pa sang sugar regulatory agency, may stock subong ang Pilipinas nga 310,000 metric tons sang refined sugar nga magalawig tubtub sa Oktubre, gani nga ang pagpasulod sang import ang maga-umpisa sa Hulyo tubtub sa Nobyembre 30.
