Pormal na nga ginbaton sang Maasin Local Government unit ang premyo nga P2 million pesos, matapos magdaog ang Tultugan Festival sa ginhiwat nga Parada ng Kalayaan 2025.
Ini kabahin sang ika-127 nga selebrasyon sang Araw ng Kalayaan sang Pilipinas.
Sa interview sang Bombo Radyo kay Maasin, Mayor Francis Amboy, iya ginpahayag nga indi matupungan ang kalipay nga iya nabatyagan matapos nga nagkampyon sa Parada nga Kalayaan 2025 nga ginhiwat sa Metro Manila ang Tultugan Festival.
Suno sa iya, maswerte gid ini bilang alkalde sang banwa bangud nga ginbugayan siya sang mga mapisan nga mga opisyales kag mga pumuluyo nga nagakooperar kag padayon nga nagaugyon.
Nagpasalamat man siya kanday Iloilo Governor Arthur Defensor Jr., Vice Governor Christine “Nathalie Ann” Debuque, kag sa Iloilo Festivals Foundation Inc. (IFFI) bangud sa paghatag sang kahigayunan nga maipakita sa bug-os nga pungsod ang talento kag kultura sang Maasin.
Dugang pa sang alkalde, ang pagkampyon sang Tultugan Festival indi lamang dungog para sa banwa sang Maasin, kundi para man sa bilog nga probinsya kag syudad sang Iloilo.
Ang Tultugan Festival nagapakilala sa musika kag ritmo sang kawayan, nga simbolo sang mangaran nga industriya sang bamboo sa Maasin. Isa ini ka selebrasyon sang kaalam, talento, kag kultura sang mga Ilonggo.
