Opisyal na nga nagpanumpa bilang complainants sa kaso sang mga nadula nga manugbulang ang whistleblower nga si Julie Patidongan alyas “Totoy”, upod ang pamilya sang mga biktima, sa National Police Commission (NAPOLCOM) headquarters subong nga adlaw, Hulyo 14.
Ginbuyagyag na ni Patidongan ang mga pangalan sang mga kapulisan nga, suno sa iya, wala ginlakip sa una nga listahan sang mga gin-imbestigaran nga posible may kahilabtanan sa pagkadula sang mga sabungero.
Sa iya pahayag, nagpasalamat si Patidongan sa suporta sang mga pamilya sang mga nadula, kay Presidente Ferdinand Marcos Jr., kag kay PNP Chief Gen. Nicholas Torre III, nga nagapadayon sang pagpangita sang hustisya sa kaso.
Suno sa whistleblower, may mga sumulunod si gaming tycoon Atong Ang, lakip na ang isa ka police colonel nga iya ginpahayag nga nagabantay kag posible nagapamahog sa iya.
Ginklaro man ni Patidongan nga ginkuha sang amo nga colonel ang iya 12 ka cellphone, isa ka cap, kag isa ka passport, nga kabahin sang personal niya nga mga gamit.
Sa pihak sang mga pagpamahog nga iya nabaton, nagpasalig si Patidongan nga padayon siya magabulig sa pagpangita sang hustisya para sa mga nadula nga manugbulang kag para sa ila mga apektado nga pamilya.
