Nakatalana nga makipagsapol si Mayor Raisa Treñas sa mga katapo sang Department of Public Works and Highways (DPWH) bwas nga adlaw, Hulyo 15, 2025, agud istoryahan ang padayon nga problema sang pagbaha sa pila ka barangay sa siyudad.
Sa interview sang Bombo Radyo kay Treñas, iya ginpahayag nga luyag niya mahibaluan kun ngaa apisar may mga proyekto na, ginabaha gihapon ang mga barangay ilabi na sa distrito sang Jaro.
Ginpunto ni Treñas nga lima ka barangay sa Jaro ang ginabaha sang madalom, nga nagalab-ot sa 3-4ft.
Ang ini nga Barangay ang ginalakipan sang Balantang, Buntatala, Camalig, Lanit kag Tagbak.
Suno sa alkalde, may mga report man siya nga nabaton nga posible ang isa sa mga rason sang pagbaha amo ang proyekto ni lone district representative Julienne “Jam-Jam” Baronda.
Ginpahayag ni Treñas nga kinahanglan ipatawag ang atensyon sang DPWH agud matutukan kag masolusyunan na ang problema, nga nagapadayon apisar pa sang mga ginahimo nga tikang.
Ginalauman nga isa sa mga nagapanguna nga agenda sa ila pagsinapol bwas nga adlaw amo ang assessment sang mga drainage kag flood control projects sa syudad sang Iloilo.
