Isa ka 55-anyos nga amay ang nagpalagyo kag gintaban ang 22-anyos nga nobya sang iya menor de edad nga anak.
Gindala pa sini ang tanan nga sinuptan kag mga alahas sang ila nga pamilya.
Ang amay amo si Shakeel,may anom ka kabataan kag tatlo ka apo.
Suno sa pamilya, nagpalagyo ini padulong sa Delhi agud pakaslan si alyas nga nobya nga ginahanda kuntani para sa iya nga 17-anyos nga anak nga si alyas Aman.
Suno sa iya asawa nga si Shabbana, si Shakeel mismo ang nagpilit sa pagpakasal nanday Aman kag Ayesha, bisan pa nga nagapamatok sila bangud sa tuman ka bata nga edad kag kakulangan sa kwarta.
Apang sa wala ginlauman nga kapalaran, nagtawag si Shakeel halin sa Delhi agud ipahibalo nga siya na mismo ang nagpakasal kay Ayesha.
Ginpakigbahin man ni Shabbana nga masami nagabisita si Shakeel kay Ayesha sa ngalan sang pagpanghanda sa kasal, apang madugay na niya nga ginadudahan ang relasyon sang duha.
Sa pihak sang iskandalo, wala pa sang pormal nga reklamo nga ginpasaka batok kay Shakeel.
