Nagpasalig ang bag-o nga OIC Regional Director sang Department of Social Welfare and Development (DSWD) Region 6 nga magapadayon ang ginapatuman nga mga programa nga nagatuyo magpauswag sang kabuhi sang mga pumuluyo sa Western Visayas.
Isa sa mga nagapadayon nga inisyatibo amo ang “Walang Gutom” innovation program nga ginaduso sa national level sa liderato ni DSWD Secretary Rex Gatchalian.
Nakalinyada man ang Extension Accreditation Pilot Program, nga nagsugod na sa Iloilo, kag ginapaabot nga magalapnag pa sa iban nga mga probinsya sa rehiyon.
Sa interview sang Bombo Radyo kay OIC Regional Director Joselito Estember, ginpahayag sini nga nagapadayon ang Pantawid Pamilyang Pilipino Program (4Ps), kag subong nga tuig may target ang DSWD nga mapagraduate ang masobra 50% sang mga benepisyaryo, ukon kabug-osan nga 175,000 ka pumuluyo nga ginaalalayan sang programa.
Ginapadayon man ang koordinasyon sa mga local government units (LGU) agud masiguro ang padayon nga pagbangon sang kabuhi sang mga pamilya bisan matapos na ang ila benepisyo sa 4Ps.
Gindugang pa ni Estember nga may yara man sang X-Program para sa mga medical nga kinahanglangon, samtang kabahin man ang DSWD-6 sa Buong Pilipinas Handa nga kampanya para sa disaster preparedness and response, kun sa diin nagahanda na sila sang mga food packs kag relief goods sa tion sang kalamidad.
Para naman sa mga unemployed nga benepisyaryo sang 4Ps, may Serbisyo Caravan ukon Trabaho Tulong Program nga ginahiwat ang ahensya sa nagkalain-lain nga lugar sa rehiyon, agud matagaan sang oportunidad sa palangabuhian ang mga wala pa sang permanente nga trabaho.
Sa karon, may 43,000 ka benepisyaryo ang yara sa Western Visayas kag ginakabig nga 1.5 bilyon pesos ang gina-invest sang national government kada tuig para sa mga programa nga ini.
Ginpasalig ni Estember nga padayon ang commitment sang DSWD-6 sa pagbulig sa mga pumuluyo, kag ginapaninguhaan nga mas madamo pa ang mabenepisyuhan sa palaabuton.
