Ginpamatud-an sang 49-anyos nga security guard nga wala sang edad kun ang paglab-ot sa handom ang pagaistoryahan.
Ini amo si Julian Avila, security guard sa University of Caloocan City (UCC).
Sang damlag lang, nakatapos si Avila sang degree program nga Bachelor of Public Administration sa amo nga unibersidad kun sa diin siya naga-duty.
Suno sa Facebook post sang UCC, sa sulod sang malawig nga tuig, nangin pamilyar nga nawong si Avila nga hipuson lang kag nagabantay sa palibot.
Apang sa likod sini amo ang iya handom nga makatapos sa kolehiyo.
Sa bulig sang LGU- Caloocan, kag sa idalom sang isa ka programa nga nagahatag sang oportunidad sa mga empleyado sang gobyerno nga makaeskwela samtang nagatrabaho, liwat nga nabuhi ang iya paglaum.
Sa idalom sang Bachelor of Public Administration-Evening Classes for Government Employees (BPA-ECGE), nagpadayon siya sa iya nga serbisyo sa adlaw bilang guwardiya, kag sa gabi bilang estudyante.
Tubtob nga natapos niya ini.
Tuman naman ang iya pagpasalamat sa Board of Regents nga ginapamunuan ni Chairman, Hon. Mayor Dale Gonzalo R. Malapitan, nga nangin instrumento agud matuman ang iya handom.
