Luwas na sa katalagman ang walo sa 21 ka Filipino nga seafarers sang MV Eternity C matapos ini maglugdang sa Red Sea sang gin-atake sang Houthi rebels sang Hunyo 7.
Suno sa Department of Foreign Affairs (DFA), naka-abot na sa Kingdom of Saudi Arabia ang mga na-rescue nga tripulante kag yara na sa joint custody sang Philippine Consulate General sa Jeddah, Migrant Workers’ Office – Jeddah, kag sang ila shipping agency.
Ginpaathag sang DFA nga ipaidalum anay sa mandatory medical assistance ang mga na-rescue antes ipaidalum sa natalana nga repatriation program pauli sa Pilipinas.
Nagpasiguro man ang Department of Migrant Workers (DMW) nga nagahugpong sila sang pwersa kaupod ang DFA kag Overseas Workers Welfare Administration (OWWA) agud mapadasig ang pagpauli sang mga tripulante kag masiguro ang ila kahimtangan.
Matandaan nga sang Hunyo 7, gin-atake sang Houthi militants ang MV Eternity C gamit ang sea drones kag rocket-propelled grenades samtang naga-navigate ini sa Red Sea, isa sa mga delikado nga ruta sang international shipping bangud sa armado nga tensyon sa rehiyon.
Padayon nga ginapangitaan sang paagi sang gobyerno ang iban pa nga mga tripulante kag ginapangabay ang kooperasyon sang international community para sa seguridad sang mga Filipino seafarers sa Middle East.
