Ginpasirado sang Boarding House Commission (BHC) ang siyam ka mga boarding house sa Iloilo City matapos matukiban nga wala sang business permit kag iban pa nga legal nga dokumento.
Sa 2,679 ka rehistrado nga boarding houses, 1,960 na ang na-validate tubtob Hunyo 30, kun sa diin 898 ang wala sang permit halin sa city government.
Sa interview sang Bombo Radyo kay Joy Fantilaga-Gorzal, tagpamaba ni Mayor Raisa Treñas, ginhatagan sila sang pito ka adlaw nga deadline ang mga tag-iya agud makakompleto sang requirements sa Business Permits and Licensing Division.
Apang ang siyam ka wala nag-comply, kag wala man nakasunod sa Building Code kag Fire Code, gilayon nga ginpasirado samtang padayon ang inspeksyon sa preparasyon sang pagbukas sang klase.
