Text by: Bombo Ray Gerald Badiang
Gina-target sang Department of Public Works and Highways (DPWH) nga masuguran na sa tuig 2026 ang konstruksyon sang Panay-Guimaras-Negros Bridge, isa ka major nga infrastructure project nga ginapangunahan sang DPWH Central Office.
Sa interview sang Bombo Radyo kay Engr. Arecio Casing, Regional Director sang Department of Economy, Planning and Development Region 6 (DEPDEV-6), ginpahayag sini nga nagapadayon na ang preparasyon kag ginapaabot nga sa bulan sang Setyembre subong nga tuig, matapos na ang detailed engineering design.
Pagkatapos sang 8–9 ka bulan nga proseso sang procurement, posible na nga magsugod ang aktuwal nga konstruksyon sang first phase sang proyekto sa Hulyo 2026.
Ang proyekto may duha ka phase: Section A – Panay to Guimaras, kag Section B – Guimaras to Negros. Suno kay Dir. Casing, ang una nga phase nga Panay to Guimaras ang ginatarget nga masuguran sa Hulyo 2026, kag ginalauman nga matapos ini sa tuig 2028.
Subong pa lang, ginakonsiderar na sang ahensya ang mga teknikal nga aspeto sang proyekto, lakip na ang lokasyon sang mga column kag foundation, soil condition sa palibot, kag environmental impact sang konstruksyon.
Luyag sang DPWH nga mangin sigurado ang kalig-on kag kaluwasan antes pa ini tukuron.
Samtang ginahulat ang pagsugod sang Panay-Guimaras-Negros Bridge, padayon man ang iban nga proyekto sang nasambit nga departamento, pareho sang Panay River Basin Development Project nga nagatuyo maghatag sang irigasyon sa mga uma, kag ang Iloilo-Capiz-Antique Expressway, nga isa pa ka strategic expressway project para sa mas paspas nga koneksyon sa mga probinsya sang Western Visayas.
Ginalauman sang mga otoridad nga sa tion nga matapos ang tulay, mangin masulhay ang biyahe kag negosyo sa tunga sang tatlo ka pulo Panay, Guimaras, kag Negros kag magabukas ini sang mas madamo nga oportunidad sa ekonomiya kag turismo sa rehiyon.
