Apektado ang pito ka mga pamalay sa nagluntad nga landslide nga tuga man sang pagtupa sang mamunog nga ulan dala sang Habagat nga ginpabaskog pa ni Bagyo Crising sa bahin sang Barangay Abiera, Sebaste, Antique.
Sa interview sang Bombo Radyo kay Avigen Jonelas, residente sang amo nga lugar, iya ginpahayag nga pasado ‘las 6:00 sa kaagahon sang nahulogan sang duta ang balay nga iya gina-ubrahan.
Suno kay Jonelas, gilayon nila nga ginbuligan sang iya bana nga sayluhon sa ila mismo puluy-an ang tag-iya sang ila nga gina-obrahan, bangud ini ang baldado na kag wala sang ikasarang mga maglakat.
Pahayag man ni Jonelas nga handa ang ila pamilya nga mag-evacuate kun kinahanglan, ilabi na nga nakit-an nila ang posibilidad nga madalahig man ang ila balay kun magpadayon pa ang pag-osos sang duta.
Sa subong, padayon nga nagapaandam ang local nga pamunuan sang Barangay Abiera sa mga residente bangud sang presensya sang litik nga nakita sa ibabaw sang bukid, isa ka indikasyon nga may posibilidad pa sang dugang nga landslide.
Nahibaluan nga mga landslide prone areas ang mga banwa sang Sebaste, Barbaza kag Patnongon sa probinsya sang Antique.
Sa subong, naglab-ot na sa 56 ka mga pamalay ang naapektuhan sang landslide sa bug-os nga Probinsya sang Antique bangud sang wala untat nga pag-ulan ulan.
16 ka balay ang totally damaged samtang 40 naman ang partially damaged.
