Ginpangunahan ni Third Dsitrict Representative Lorenz “Nonoy” Defensor ang groundbreaking ceremony sang tatlo ka proyekto nga pagatukuron sa banwa sang Pototan.
Ginalakipan ini sang 71.30 linear meters nga taytay nga magakonekta sa Brgy. Cato-ogan kag Cau-ayan kag may tinutuyo nga makapatabok sang 13 ka mga barangay sa banwa sang Pototan.
Ang nasambit nga proyekto ang mayara sang approved budget nga P49,000,000 nga magahalin General Appropriations Act FY 2025 DPWH Infrastracture Program kag ginalauman nga matapos sa Enero 16, 2026.
Samtang, may ara naman sang approved budget nga P2,970,000 ang pagatukuron nga 546.25 square meters nga Multi-Purpose Building sa Brgy. Cato-ogan kag ginalauman nga matapos sa Oktubre 4,2025. Ini ang maga-serbe nga emergency evacuation center hinali nga may mamunog nga ulan ukon pag-baha kag subong man magamit sa nari-sari nga akitibidad.
Lakip sa pagatukuron nga proyekto ang 351.00 square meters nga Multi-Purpose Building sa Edmundo Dayot Memorial Elementary School sa Brgy. Cato-ogan nga may approved budget nga P2,475,000. Ini ginalauman nga matapos sa Setyembre 26, 2025.
Sa interview sang Bombo Radyo kay Congressman Lorenz Defensor, iya ginpahayag nga ang tatlo ka proyekto ang isa ini sa pinaka kritikal nga gin-ayo sang alkalde sang banwa apang dako ini nga bulig agud mapamag-an ang kabuhi sang mga estudyante sa Pototan Comprehensive National High School, West Visayas State University- Pototan Campus, kag ILLECO 3, high way padulong sa banwa sang Dingle kag Passi City ilabi na kun rush hour kag nagapugok ang trapiko sa main road.
Ang groundbreaking ang gintambungan man kanday Iloilo Provicial Vice Governor Nathalie Ann Debuque, Pototan Mayor Enrique Lazaro, mga Sangguniang Bayan Members, Barangay Officials, DPW, kag mga pumuluyo sa banwa sang Pototan.
