Padayon gihapon ang ginahimo nga imbestigasyon sang Iloilo City Police Office (ICPO) may kaangtanan sa nasapwan nga patay nga lawas sang isa ka pulis sa Esplanade 1, Mandurriao kahapon sang adlaw, Hulyo 20, 2025.
Sa interview sang Bombo Radyo kay PMAJ. Shella Mae Sangrines, spokesperson sang ICPO, tuman gid ang kasubo sang ila departamento sa natabo, kag nagpaabot man sila sang pagpakig-unong sa pamilya sang pulis.
Ginbuyagyag ni Sangrines nga magabuligay ang iya team sa case review nga pagatambongan man sang city director agud mahibaluan ang kabangdanan sang kamatayon sang biktima kag mabuligan nga matukiban ang personal nga impormasyon kag background sang biktima.
Ginsiling ni Sangrines nga ginausisa man ang mga tawo nga ulihi nga nakaupod sang biktima agud matumod kun may yara sang foul play nga anggulo sa iya kamatayon.
Suno pa sa Regional Forensic Unit, ipaidalom na ang bangkay sa autopsy.
Ginapahayag man ni Sangrines nga importante gid ang kooperasyon sang pamilya sang biktima sa paghatag sang dugang nga impormasyon, kag padayon ang ila pagpakig-angot sa mga ini para sa mas madasig kag husto nga imbestigasyon.
