Text by: Bombo Ray Gerald Badiang
Nasapwan na ang bangkay sang solterito nga nalumos sa isa ka creek sa Bgry. Tagbak, Jaro, Iloilo City.
Ini amo si alyas Kiel, 13-anyos ang edad.
Ang insidente natabo sang nagligad nga Domingo, Hulyo 20, 2025, samtang ang biktima kag iya mga kaabyanan nagapaligo sa creek lapit sa ila nga balay apang wala na ini nakapauli sa ila puluy-an.
Sa interview sang Bombo Radyo kay Kim Euver Magcanam, isa ka miyembro sang Advent Rescuers, ginpahayag sini nga nalabayan sang isa ka residente ang bangkay sang biktima sa kilid sang creek sang subong nga adlaw, Hulyo 22.
Nag- umpisa kahapon, Hulyo 21, ang ila nga search and rescue operation, apang wala nila nakita ang bangkay.
Ang lugar kun sa diin nasapwan ang lawas sang biktimga ang may kalayuon nga 150 metros lang halin sa lugar nga ginpaliguan sang biktima.
May pilas ini sa wala nga bahin sang iya agtang kag ginapatihan nga naigo ang ulo sini sang matalom nga butang.
Sa interview naman sang Bombo Radyo kay Ruben Meguillo, amay sang biktima, ginpahayag sini nga pag-abot niya sa ila nga puluy-an, pagkatapos sang sang search and rescue operation kahapon nga adlaw, siya mismo ang nagbulig sa pagpangita kag pagsalom sa creek sa iya nga bata.
Gin-ako man niya nga wala naman sila naglaum nga makit-an pa nga buhi ang iya anak.
Wala naman sila sang plano nga ipaidalom pa sa autopsy ang lawas sang biktima.
