Gin-athag sang Davao City police nga indi matuod ang alegasyon sang isa ka 17-anyos nga dalagita nga ginkidnap ini.
Ini matapos nadiskubre nga ang dalagita ang nagpadulong sa balay sang iya nobyo.
Una diri, nagreport ang iya pamilya nga nadula ang dalagita sang Hulyo 14 kag nagpadala man ini sang voice message sa iya abyan nga nagasiling nga ginkidnap siya kag kinahanglan niya sang bulig.
Madasig naman ini nga naglapta sa social media.
Sang Hulyo 16 sang gab-i, nakit-an ini sa higad sang dalan sa Brgy. Bato, Toril, Davao City.
Sa ginhimo nga imbestigasyon, wala nagasanto ang iya pahayag.
Tubtob nga natukiban nga didto lang siya nagtinir sa balay sang iya nobyo kag nag-ako man ang lalaki kun sa diin nakit-an pa ang school uniform kag backpack sa balay sang nobyo.
Plano naman sang pulis nga magpasaka sang kaso batok sa dalagita bangud sa pagpalapta sang sala nga impormasyon.
