Nadismaya si Vice President Sara Duterte sa estilo sang Department of the Interior and Local Government (DILG) sa pag-anunsyo sang suspensyon sang klase kag trabaho sa tion sang malain nga panahon.
Ginpahayag ni VP Sara nga dapat mangin propesyonal ang DILG, ilabi na sa pagpamuno ni Secretary Jonvic Remulla, kag indi paghimuon nga daw kaladlawan ang mga anunsyo nga ginapalab-ot sa publiko.
Ginpaanggid pa ni Duterte ang ginahimo sang DILG sa mga pahayag sang Office of the Vice President (OVP), kag gintumod nga bilang kabahin sang institusyon sang gobyerno, may responsibilidad sila nga mangin seryoso sa tanan nga impormasyon nga ginahatag sa katawhan.
Madumduman nga damo sa mga netizens ang nagpakita sang kasubo kag pagkadismaya sa paagi sang DILG sa paggamit sang mga tinaga nga daw indi angay, ilabi na sa tion sang kalamidad.
Angot sini, nagpangayo na si Remulla sang pasaylo sa publiko kag ginsiling nga ginhimo lamang nila ini agud nga mapamag-an ang sitwasyon.
