Ginlibot sang Facility Conservation Office sang syudad ang pila ka mga pumping station agud siguruhon nga naga-operate ini sang insakto sa tunga sang pagbaha nga naeksperyensyahan sa syudad.
Sa interview sang Bombo Radyo kay Joel Gerasmia, Chief of Staff sang Facility Conservation Office, ginpahayag sini nga isa lang sa anom ka pumping station sa syudad ang temporaryo nga non-functional, amo ang ara sa Calajunan nga ginbarado sang basura kag may mga lay-on.
Suno kay Gerasmia, gilayon nila nga ginlibot ang mga pump stations sa Jalandoni, Lapuz, Maria Clara, City Proper kag General Luna sang nagsugod ang pagbaha, agud masiguro nga naga-operate sang insakto.
Ang Facility Conservation Office, nga gintukod ni Mayor Raisa Treñas paagi sa Executive Order No. 020, amo ang may mandato nga magmintinar sang mga pasilidad sang gobyerno lakip na ang drainage system kag mga electrical equipment.
Ginklaro sang opisina nga padayon ang ila pagbantay kag koordinasyon agud mapadasig ang pagresolba sa mga problema sa pasilidad, ilabi na sa tunga sang kalamidad.
