Posible nga madugangan pa ang mga banwa sa Iloilo nga magadeklarar sang state of calamity kasunod sang daku nga halit sang habagat nga ginpabaskog pa sang sunod-sunod nga mga bagyo sa Pilipinas.
Suno sa Iloilo Provincial Disaster Risk Reduction and Management Office (PDRRMO), mahimo nga mag-deklarar ang Leganes kag Zarraga bangud pareho nga sobra sa 15% ang apektado nga populasyon.
Una na nga nagpaidalom sa amo nga status ang Pototan bangud sa halit sang enhanced southwest monsoon kag mga Bagyo Dante kag Emong sa sektor sang ila agrikultura.
Sa interview sang Bombo Radyo kay Retired Police Colonel Cornelio Salinas, head sang opisina, iya ginpahayag nga paagi sa sini nga deklarasyon, ma-mobilize ang kinahanglanon nga resources para sa emergency response, relief operations, kag recovery measures.
Ginlaragway man ni Salinas nga “intense” gid ang epekto sang habagat sa probinsya bangud nahalitan sini ang 22 ka mga banwa kun sa diin may 210 barangays. Nakarekord ang opisina sang 355 ka mga balay nga nagkalaguba kun sa diin 322 diri ang partially damaged kag 33 naman ang totally damaged.
Nauna naman nga ginpahayag ni Governor Arthur Defensor, Jr. nga nagdangat na sa masobra P2.2 million ang balor sang kahalitan sa agrikultura sa probinsya ilabi na ang mga talamnan sa Lambunao, Leganes, Oton, Pototan, San Joaquin, San Miguel, kag Tubungan.
