Nagpabutyag sang suporta kag pagpasalamat si Iloilo City Mayor Raisa Treñas sa inisyatibo nga ginpresentar ni Presidente Ferdinand Marcos Jr. sa iya 2025 State of the Nation Address kahapon nga adlaw, Hulyo 28.
Sa interview sang Bombo Radyo kay Joy Fantilaga-Gorzal, spokesperson ni Mayor Treñas, iya ginpahayag nga madamo sa mga prayoridad nga ginplastar ni Marcos ang nagtandog sa mga isyu nga ginaatubang sang Iloilo City kag nagtupong man sa mga inisyatibo sang lokal nga panggobyerno.
Suno kay Gorzal, ginsentro ni Mayor Treñas ang iya pagsuporta sa national government sa mental health sang kabataan, lakip na ang pagdugang sang mga school counselors.
Ginpahayag niya nga ang lokal nga pamunuan may yara na sang inisyatibo para mapasangkad ang mental health advocacy sa mga eskwelahan nga kaangay sang ginatudlo nga education reform agenda sang syudad.
Ginpanginbulahan man ni Treñas ang plano sang Presidente nga padayunon ang feeding program, nga suno sa iya, kaangay sang operasyon sang Iloilo City Nutrition Center, sa diin ang syudad mismo ang naga-preparar sang pagkaon para sa mga kabataan.
Gin-athag man sini nga ang syudad ang nag-partner sa DOST kag Florete Group of Companies Foundation agud mapabakod ang kapasidad sang Nutrition Center.
