DUMANGAS, Iloilo — Padayon pa nga ginapangita sang mga otoridad si alyas “BemBem,” isa ka tanod sang Barangay Sulangan, Dumangas, matapos gintudlo nga responsable sa pagtiro kay Samuel Adelantar.
Sa interview sang Bombo Radyo kay Jessa Adelantar, anak sang biktima, ginsiling niya nga dismayado sila sa mga tanod bangud sa indi maabtik nga pagresponde sa insidente.
Suno sa iya, nangayo sila sang bulig agud matawgan ang ambulansya kag ang kapulisan agud madakpan si “BemBem,” apang ginsugo lang sila nga magkadto pa sa barangay hall.
Ginbuyagyag pa ni Adelantar nga may isa pa ka tanod nga ginpangayuan nila bulig pero nagsabat nga indi siya pwede kay may bisita siya.
Nagpanindugan si Adelantar nga responsibilidad sang mga tanod ang magresponde sa insidente, bisan pa may personal nga bisita.
Suno sa iya, ex-kagawad pa ang nangita sang paagi nga matawgan ang pulis, samtang ang mga tanod, wala sang ginbuhat kundi magpungko lang kag magsabat sa ila.
Ginausisa pa sang otoridad ang rason sang insidente nga ginalantaw nga personal nga hiligut-anon ang rason.
