Liwat nga maga-upod si Rhenz Abando sa Anyang Red Boosters sa iya pagbalik sa Korean Basketball League (KBL), matapos ang masobra isa ka tuig nga pagbiya sa team.
Gin-anunsyo sang Red Boosters ang opisyal nga pagbalik ni Abando, nga isa ka dako nga bulig sa ila pag-angkon sang KBL championship sang 2022-2023 season.
Isa siya sa nangin liyabe sang ila nga kadalag-an batok sa Seoul SK Knights sa Game 7 sang finals.
Antes sini, ginpangunahan man sang anay NCAA Rookie MVP ang Anyang sa pagdaog sang titulo sa East Asia Super League (EASL) Champions Week sang Marso 2023.
Apang sang Mayo 2024, ginpahibalo ni Abando ang iya pagbiya sa team matapos ang duha ka tuig nga pagserbisyo.
Subong nga tuig, magabalik siya sa Anyang pila ka adlaw matapos niya ginbuligan ang Strong Group–Philippines sa ila kampanya sa William Jones Cup sa Taiwan.
Ginhingadlan man si Abando bilang kabahin sang inisyal nga roster sang Gilas Pilipinas para sa 2025 FIBA Asia Cup, apang suno kay national team head coach Tim Cone, wala siya nakatambong sa mga ensayo sang team.
Sa gihapon, ginahulat sang mga fans ang iya kontribusyon sa pagbalik liwat sa international stage, kaupod ang isa sa mga powerhouse teams sang KBL.
