[Trigger Warning: Drug use / substance abuse]
Nagtuga sang kakugmat sa pumuluyo ang natabo sa pila ka pamatan-on sa Brgy. Mandaragat, Puerto Princesa City, Palawan matapos nakit-an ang mga ini nga nagahulag kaangay sang mga ‘zombies’ matapos nagpanigarilyo sang isa ka substance nga ginatawag nga “tuklaw.”
Sa naglapta nga video, makit-an ang tatlo ka kabataan nga gina-kombulsyon kag nagakurog sa kilid sang karsada.
Suno sa otoridad, bag-o ang insidente, nakit-an ang grupo nga nagapanigarilyo kag wala nagdugay, lain na ang ila mga hulag.
Ginpangdala naman sa ospital ang mga biktima.
Nahibaluan nga ang “tuklaw” nga ginasiling nga isa ka sahi sang herbal material ang ginapatihan nga halin sa Vietnam.
Wala pa matumod kun ano nga kemikal ang makit-an sa amo nga sahi sang sigarilyo.
