Ginkalipay ni City Councilor Johnny Young, Chairman sang Committee on Engineering, Construction and Public Works, ang direktiba ni Presidente Ferdinand Marcos Jr. nga ipa-audit ang mga flood control projects sa bug-os nga pungsod.
Sa interview sang Bombo Radyo, ginpahayag ni Young nga antes pa man gin-anunsyo sang presidente, nakapatawag na siya sang meeting kaupod ang mga ahensya sa syudad kag nagpa-review na sang mga proyekto, ilabi na bangud sang mga bag-o lang nga pagbaha sa Iloilo City.
Magapatawag liwat si Young sang dugang nga meeting kaupod ang mga barangay kapitan sang nagkalain-lain nga barangay sa syudad upod ang DPWH, city engineers kag concerned department heads agud mahibaluan kun may permiso, legal, kag usisaon kun insakto ang scope of work sa mga proyekto.
Ginsuportahan man ni Young ang ginpagwa nga cease and desist order ni Mayor Raisa Treñas nga nagpauntat anay sang tanan nga proyekto sa syudad tubtob matapos ang imbestigasyon.
