“Para sa akon, bulag kag bungol ang iban ko da nga upod,” ini ang nangin pahayag ni Iloilo City Councilor Sheen Marie Mabilog sa iya pagkadismaya matapos siya liwat nga ginpulihan sang mayoriya sang konseho bangud wala gin-aprubahan ang iya ginaduso nga ordinansa sa pagpanubo sang 80% sa Real Property Tax.
Sa interview sang Bombo Radyo kay Councilor Sheen Marie Mabilog, iya ginpahayag nga para sa iya, daw bulag kag bungol ang pila niya ka-upod sa konseho sa kabudlay nga ginabatyag sang mga taxpayer sa syudad.
“Daw para sakon ang paghangop ko ni ya daw bungol kita ya kag bulag, sa suffering sang mga taxpayer naton, may-ara ga close businesses, may ara mga pensioners nga nagapalapit,” suno kay Mabilog.
Ginpahayag man ni Mabilog nga dismayado gid siya nga wala siya ginhatagan sang konsiderasyon sang konseho bisan pa may mga data siya nga ginpresentar.
“Bisan ano pa nga explanation ko sirado gid ya sila, nisan may data nga gin present,” dugang pa sang konsehal.
Ginpabutyag niya nga daw wala sang interes ang iban nga mangin bukas ang paminsaron kag magpamati sa sitwasyon sang pumuluyo.
“Ang importante, indi ko ya maghipos, kay may nakita ko ya nga indi mayo, kag indi ko ya nila mapahipos. Ang akon adbokasiya is to fight for what’s the best for the people,” pahayag ni Mabilog.
Gindugang ni Mabilog nga indi siya maguntat sa pagpangita pa sang paagi nga maprotektahan ang interes sang pumuluyo, kag padayon siya nga magatindog sa kung ano ang insakto kag para sa kayuhan sang tanan, kag indi siya mapahipos bisan pa ano pa ang opposition nga iya atubangon.
