Ginpanindugan ni Assistant Majority Leader, Rep. James “Jojo” Ang Jr. ang iya suporta sa mga programa sang administrasyon ni Presidente Ferdinand “Bongbong” Marcos Jr., ilabi na ang mga inisyatibo nga naga-angut sa pagpaayo sang healthcare services, pagtukod sang sports facilities, kag pagsolbar sang backlog sa mga eskwelahan.
Sa interview sang Bombo Radyo kay Rep. Ang, ginpahayag sini ang iya kalipay sa paghatag sang pagsalig sa iya bilang kabahin sang liderato sang Kongreso. Suno sa iya, isa ini ka oportunidad agud makabulig siya sa pagpasanyug sang mga programa nga may direct nga epekto sa kabuhi sang pumuluyo.
Ginpunto ni Ang nga dapat siguruhon sang mga ahensya kag local government units nga ang mga proyekto nga ginapatuman may yara sang klaro nga plano, legal nga proseso, kag accountable nga pagpanguna.
Ginpasalig niya nga magapadayon siya sa aktibo nga pagbulig sa pagpanday sang mga polisiya kag pagmonitor sang implementasyon sang mga proyekto para sa kaayuhan sang mga pumuluyo sa iya distrito kag sa bilog nga pungsod.
