Wala na nakalab-ot sa ospital ang isa ka 28-anyos nga pahinante matapos mabungguan sang dump truck sa Sitio Laguerta, Barangay San Jose, San Miguel, Iloilo.
Ang biktima amo si alyas Rey, residente sang Sigma, Capiz.
Ang driver naman sang truck amo si alyas Ren.
Base sa imbestigasyon sang San Miguel Municipal Police Station, nagakatulog ang pahinante sa idalom sang naka-park nga dump truck sang matabo ang insidente.
Ginpahayag nga manuglarga na ang truck kag sang nag-atras ini, may nabatian nga singgit ang driver.
Sang iya ginlantaw, nakit-an niya ang pahinante sa idalom sang truck kag may patal nga mga pilas sa ulo.
Ginapahayag nga yara sa impluwensya sang alkohol ang biktima.
Wala naman sang plano nga magpasaka sang kaso ang pamilya sang napatay.
