Ginpahayag ni Senate President Pro Tempore Jinggoy Estrada nga kadam-an sa mga senador nga kabahin sang supermajority ang magatuman sa desisyon sang Korte Suprema nga naga-deklarar nga unconstitutional ang articles of impeachment batuk kay Bise Presidente Sara Duterte.
Suno kay Estrada, base ini sa body language kag mga pahayag sang iya mga kaupdanan sa Senado nga dapat sundon ang mando sang Korte Suprema
Sa Agosto 6, nakatala ang pagboto sang Senado sa plenaryo kun angay bala respituhon ang desisyon sang Korte Suprema, bisan wala pa nagaguwa ang ruling sa motion for reconsideration nga ginpasaka sang Kamara.
Apang ginpahayag man nga may posibilidad nga magpadayon ang impeachment case kon baliskaron sang Korte Suprema ang una sini nga desisyon kag indi pag-ibasura ang kaso batuk sa Bise Presidente.
Ginpanindugan man ni Estrada nga indi siya magapirma sa draft resolution nga ginapalibot ni Senador Kiko Pangilinan nga naga-apelar nga repasuhon liwat sang Korte Suprema ang iya desisyon may kaangtanan sa impeachment articles.
Apat na ka senador ang nabalita nga nagpirma sa resolusyon: sanday Senators Risa Hontiveros, Bam Aquino, Tito Sotto, kag mismo si Senador Pangilinan.
Suno kay Estrada, bisan pa maayo ang pagpresentar sang mga nagapabor sa resolusyon, ang desisyon sang Korte Suprema ang ila tumanon, luwas na lang kon mabaliskad ini paagi sa motion for reconsideration halin sa Kamara.
