Ginpahayag sang Municipal Environment and Natural Resources Office (MENRO) sang Leon nga wala sila sang nakit-an nga deperensya ukon kakulangan sa ginahimo nga quarry operation sa Barangay Camando, Leon, Iloilo.
Ini nga pahayag naguwa sa tunga sang reklamo sang mga pumuluyo sa lugar nga nagaangkon sang problema ang taytay nga lapit sa quarry site.
Ang nasambit nga taytay amo ang primary passage sang mga residente sa barangay kag ginabatyagan nila nga nagaka-damage ini bangud sa padayon nga operasyon sang quarry.
Sa interview sang Bombo Radyo kay Ma. Melinda Peralta, Head sang MENRO Leon, ginpahayag niya nga wala sang direkta nga reklamo nga nakalab-ot sa ila opisina kag dapat nga ang barangay ang naghimo sang resolution ukon public hearing agud ma-inform sila parte sa operasyon sang quarry.
Gindugang pa ni Peralta nga ang quarry operator naga-secure sang barangay permit bilang isa sa mga requirement antes makakuha sang permiso para mag-operate.
Apang subong nga padayon ang operasyon, ginahingyo gid sang mga residente nga ipaidalum sa mas madalom nga pag-imbestigar ang epekto sang quarry sa lugar.
