Isa ka lalaki nga nagwaras kag may bitbit nga kutsilyo, patay matapos ini natiruhan sang nagresponder nga pulis sa Barangay Balabag, Pavia pasado ala-1:30 subong nga hapon, Agosto 1.
Ginkilala ang biktima kay JR Valenzuela, 33-anyos, kag residente sang nasambit nga barangay.
Sa interview sang Bombo Radyo kay Leah Valenzuela, iloy sang biktima, iya ginpahayag nga nagbaisay ang iya duha ka bata nga sanday JR kag Jelyn.
Ginpunggan niya ang ila away, apang ginlagas pa ni JR si Jelyn nga may dala na nga kutsilyo.
Bangud sini, gilayon nga nagtawag sang police ang iloy agud malikawan ang disgrasya.
Suno sa imbestigasyon sang mga kapulisan may bitbit nga kutsilyo ang biktima nga nagadalagan pakadto sa direksyon sang isa ka pulis nga nagresponde.
Bangud sini, natiruhan ang biktima kag na-igo sa tuo nga dughan.
Gilayon nga gin dala ang biktima sa ospital, apang pag-abot didto, gindeklarar nga dead on arrival.
By: 𝑩𝒐𝒎𝒃𝒐 𝑲𝒓𝒚𝒍𝒍𝒆 𝑴𝒆𝒍𝒍𝒊𝒛𝒂
