Ginpabutyag ni Police Major Jose Nemias Pamplona, hepe sang Pavia Municipal Police Station, nga wala sang plano ang pulis nga magtiro ukon magpatay sa lalaki nga nagwaras kag may bitbit nga kutsilyo sa Barangay Balabag, Pavia kundi napilitan lang ini magdepensa sang iya kaugalingon sa tunga sang delikado nga sitwasyon.
Ginkilala ang biktima nga si JR Valenzuela, 33-anyos, residente sang nasambit nga barangay.
Ginreport sang iya iloy ang biktima kaina pasado ala-1:30 sang hapon bangud sa pagsugod sini sang gamo sa sulod sang ila balay.
Suno sa imbestigasyon, nagbaisay si JR kag ang iya manghod nga si Jelyn nga nagresulta sa pagkuha ni JR sang kutsilyo kag pagpamahog nga pamatyon ang iya iloy kag manghod.
Bangud sini, nga nagapangayo ang iloy sang biktima nga si Lea Valenzuela sang police assistance matapos nga ginlagas sang biktima ang iya manghod samtang may bitbit nga kutsilyo.
Sang pag-abot sang mga kapulisan sa lugar, nakita nila si JR nga may bitbit nga kutsilyo kag nagadalagan padulong sa direksyon sang isa ka mga pulis.
Ginpahayag ni PMaj. Pamplona nga nag-atras ang pulis apang padayon gihapon nga ginsulong sang biktima kabangdanan nga gintiro siya sang pulis kag naigo ini sa tuo nga dughan.
Gindala gilayon sa ospital si JR apang ginbantala nga dead on arrival.
Suno pa kay PMaj. Pamplona, ang kutsilyo nga ginbitbit sang biktima may kalabugon nga masobra dose ka pulgada (12 inches) kag ginpahayag man sang mga testigo nga ini ang klase sang kutsilyo ginagamit sa pang-ihaw.
Dugang pa ni PMaj. Pamplona, nga ginpahayag sang iloy sang biktima sa mga otoridad nga posible nga nagagamit sang illegal nga droga ang iya bata.
Paga-imbestigashan sang mga kapulisan kun may yara na sang previous record ang biktima sa Pavia Municipal Police Station.
Nahibaluan man nga nadala sa listahan sang Person Who Use Drugs (PWUDs) ang biktima.
Ginkumpirmar man ni PMaj. Pamplona nga yara na sa kustodiya sang Pavia Municipal Police Station ang pulis nga nagtiro sa biktima apang indi pa ini pag-ipabutyag sa publiko ang iya indentity samtang padayon ang imbestigasyon.
Ginpasalig man sang hepe nga ginatuyo sang ang kapulisan sang Pavia amo ang makabulig kag magaprotekta sa pumuluyo.
Apang sa natabo nga insidente, ginpabutyag niya nga nabutang sa peligro ang kabuhi sang pulis kag gindepensahan lang sini ang iya kaugalingon.
By: 𝑩𝒐𝒎𝒃𝒐 𝑲𝒓𝒚𝒍𝒍𝒆 𝑴𝒆𝒍𝒍𝒊𝒛𝒂
