Ginpahayag ni Armed Forces of the Philippines (AFP) Chief of Staff General Romeo Brawner Jr. nga may plano ang Pilipinas nga magbakal sang mas madamo pa nga kagamitang militar halin sa pungsod India.
Suno kay Gen. Brawner, mataas ang kalidad sang military equipment nga ginahimo sang India, kag indi man ini tuman ka mahal pareho sa iban nga pungsod.
Wala niya ginsambit kun ano nga mga kagamitan ang ila gina-target nga baklon bangud sa seguridad nga rason.
Apang gin-ako niya nga nagapadayon ang proseso sang pagpadala sang India sang BrahMos cruise missile systems nga gin-order sang Pilipinas.
Ginapaabot ni Brawner nga magaabot ang duha ka set sang BrahMos systems sa pila ka masunod nga tuig.
Ang nasambit nga armas kabahin sang P18.9 billion nga kontrata para sa tatlo ka BrahMos cruise system batteries nga ginpirmahan pa sang Enero 2022, sa idalom sang nagligad nga administrasyon.
Dugang pa ni Brawner nga Abril sang nagligad nga tuig sang una nga shipment sang BrahMos systems ang nag-abot sa Pilipinas.
Ginapakita sini nga padayon ang paninguha sang Pilipinas nga pasangkaron ang kapasidad sang pungsod sa pagdepensa sa teritoryo kag seguridad national.