Nagpasalamat si Land Transportation Office (LTO) Region 6 Director Gaudioso Geduspan II kay President Ferdinand Marcos Jr. bangud kasunod sang paghatag sang pagtamod sa ahensya sa pinakaulihi nga State of the Nation Address (SONA).
Sa interview sang Bombo Radyo kay Geduspan, iya ginpahayag nga malawig na nga wala napalab-ot sa national government ang isyu nga ginaatubang sang LTO labi na ang problema sa plate number backlog.
Apang sa subong, may paglaom na suno sa iya bangud ginpahayag mismo ni Presidente Marcos nga isa ini sa mga prayoridad nga ginaresolba sang gobyerno.
Suno kay Geduspan, madugay na nga isyu ang kakulangan sang plaka sa mga salakyan, kag madamo na sa mga motorista ang nagareklamo tuhoy diri.
Sa bulig sang national government, ginapanan-aw nga mangin mas epektibo ang serbisyo sang LTO, kag mahatagan sang legal nga plaka ang tanan nga rehistrado nga salakyan.
Nagpanawagan man ang direktor sang kooperasyon halin sa publiko samtang ginapatuman ang mga reporma agud malikawan ang pagbalik sang amo nga problema sa palaabuton.
