Nagapahanumdom ang Department of Migrant Workers sa tanan nga mga Pilipino nga luyag magtrabaho sa luwas sang pungsod nga dapat siguruhon anay nga lisensyado ang recruitment agency nga ila gina-applyan.
Ini nga pahibalo ang kasunod sang simultaneous operation sang ahensya kun sa diin walo ka mga agencies ang ginpasarado sa sulod sang isa ka adlaw.
Sa interview sang Bombo Radyo kay Asec. Jerome Alcantara, iya ginpahayag isa sa mga gindagdagan sang closure order amo ang “Visa to America,” isa ka visa consultancy firm nga nadakpan nga nagapadayon sang operasyon apisar wala sang lisensya kag nalakip sa illegal recruitment.
Dugang pa ni Alcantara, ini nga lihok ang kabahin sang simultaneous closure operations sa branches sang amo nga ahensya sa Ortigas, Quezon City, Zamboanga, Isabela kag sa iban pa nga lugar.
Pahayag pa sini, ang “Visa to America” ang agency ang may yara sang branch diri sa syudad sang Iloilo sa diin nahamtang ini sa Mandurriao, Iloilo City.
Ginpahayag ni Alcantara nga ginbantayan na sang DMW ang amo nga kompaniya antes pa man ang operasyon, matapos may nagreklamo nga OFW nga naka-encounter sini sa isa ka job fair.
Suno sa reklamo, ginapromisa sang ahensya ang trabaho bilang teacher sa Amerika apisar wala ini sang permiso ukon accreditation gikan sa DMW.
Bangud sini, nagpanawagan si Alcantara sa publiko, ilabi na sa mga luyag mag-abroad, nga mag-contact ukon magpadala sang mensahe sa DMW agud ma-verify kun legal ukon lesensyado ang ila gina-aplikaran nga ahensya.
