Nagpaguwa ang Chinese embassy sang security alert matapos nga nasamaran ang duha ka Chinese nationals sa isa ka pagpang-atake sa Tokyo, Japan sang nagligad nga semana.
Suno kay Bombo Josel Palma, international correspondent sa Japan, nagguwa sa reports nga may apat ka kalalakihan nga may dala nga tubo nga nagsakit sa duha ka mga Chinese samtang yara sila sa Kanda district sang Tokyo alas nueve sang aga sang Huwebes.
Lunsay pilas sa ulo ang naangkon sang duha ka mga biktima. Pahayag nila, wala man sang ginpangayo ang mga suspek kag indi man nila kilala ang mga ini antes ang engkwentro sang amo nga adlaw.
Nagpanawagan naman ang Chinese embassy sa gobyerno sang Japan nga ipadakop gid ang mga suspek bangud sa ila ginlaragway nga “xenophobic sentiments.”
“In response to the recent xenophobic sentiments in Japanese society, the embassy has lodged a solemn representation with Japan’s Ministry of Foreign Affairs, demanding concrete measures to be taken by the Japanese side in terms of protecting the safety and legitimate rights of Chinese citizens in Japan,” kabahin sang statement sang embahada.
Nahibaluan nga mga Chinese ang pinakadaku nga grupo sang foreigners sa Japan kag isa man sa pinakadako nga grupo sang mga turista. Magluwas diri, ginkilala man ang Chinese nationals sang nagligad nga tuig bilang pinakadako nga grupo sang foreigners nga na-naturalize bilang Japanese citizens.
Ini nga atake sa Tokyo ang natabo samtang nga nagahinampot man ang ika-80 nga anibersaryo sang pagtapos sang World War II kag Chinese People’s War of Resistance batok sa Japanese Aggression.
