Gindeklarar sang National Grid Corporation of the Philippines (NGCP) ang yellow alert status sa Visayas grid bangud sa indi supisiyente nga power reserves nga posible magresulta sa brownout.
Sa interview sang Bombo Radyo kay Reagan Alcantara, Lead Specialist sang Public Relations Department sang NGCP, ginpahayag sini nga ang yellow alert status nagakahulugan nga wala nakalabot ang power reserves sang grid sa required minimum level.
Suno sa iya, indi ini makasiguro nga may nagakaigu nga supply sa tion sang kontingensya, kabangdanan nga posible makaapekto sa distribusyon sang kuryente.
Base sa update, nag-umpisa ang yellow alert sang ala-1 sang hapon kag magapadayon tubtob alas-9 sang gab-i.
May epekto man ini sa bug-os nga Visayas grid nga nagaalagad sa mga lugar nga amo ang Samar, Leyte, Cebu, Bohol, Negros kag Panay.
Gin-athag sang NGCP nga may kabug-usan nga 733.5 megawatts nga wala magamit bangud may 11 ka power plants nga yara sa forced outage halin Abril tubtob Agosto, samtang anum pa ka planta ang may manubo nga output halin pa sang 2023.
Sa subong, ang available capacity sa Visayas grid amo ang 2,528 MW, samtang ang peak demand naglab-ot sa 2,475 MW.
Nagdugang pa gid sa pressure ang kakulangan sang supply halin sa Mindanao bangud sa outage sang Pulangi 4 Unit 3 nga may epekto nga 30 MW.
Ginpasiguro man sang NGCP nga normal ang kahimtangan sang Luzon kag Mindanao grids sa karon.
