Ginsaysay sang produkto sang University of San Agustin nga Rank 8 sa July 2025 Licensure Examination for Interior Designers ang nanuhay-tuhay nga mga inagyan sini nga naghulma man sang iya disiplina sa kaugalingon samtang gina-usoy sini ang karera nga iya napili.
Ini amo si Marben East Clarito Bonifacio, residente sang Brgy. Tabag, Pontevedra, Capiz, nga nakakuha sang 83.45% nga rating sa pasinawan.
Sa interview sang Bombo Radyo kay Bonifacio, ginpahayag sini nga nagdalagan man sa pito ka tuig ang iya pagtinir sa kolehiyo diri sa syudad.
Una ini nga nagsulod sa Pharmacy program sang unibersidad, apang makaligad ang duha ka tuig, nagdesisyon na gid ini nga mag-shift sa Interior Designing bangud diri nagasanto ang iya hilig kag abilidad.
Bangud sa pagpanghangkat sa pinansyal nga aspeto, duha ka tuig man siya nga nangin working student kag na-assign sa Campus Ministry.
Halos isa ka academic year man ini nga nag-untat bangud sa “kadungulan” suno sa iya kag napa-barkada man rason nga na-atrasar siya sa pag-eskwela.
Halin sang naka-gradwar ini sang 2022, nakasulod siya sa tatlo ka mga kumpaniya, apang na-delay man sa pagkuha sang exam bangud sa financial struggles nga kinahanglan sini lampasan.
Sa pihak sini nga mga inagyan, ginbalon na sini ang disiplina: nangin mapisan sa pag-review bisan yara sa trabaho, kag gintutukan sini ang iya target nga makapasar sa pasinawan.
“Abi ko gani A.I. (artificial intelligence),” pahayag sini sang ginbalikan ang tion nga napahibalo na sa iya nga topnotcher siya sa examination. “Ara to ang ngalan ko. Tapos number 8 ako. Ang goal ko ya makapasar lang ko ya, nakibot lang ko [nga topnotcher]. Na-shock ako. Daw tanan man nga kapoy nadula. Grabe man nga sakripisyo mo,” suno kay Bonifacio. “Sobra-sobra man ang ginhatag sang Ginuo sa akon. Ginpasalamatan ko gid sang daku.”
Panugyan sini sa iban nga mga kabataan, dapat nga may yara gid sang disiplina kag magtutok gid sa goal samtang naga-eskwela.
“Indi lang gid madulaan sang hope. May yara gid na sang solusyon ang kada problema. Malampasan mo gid na basta may ara ka disiplina kag consistent ka gid,” pahayag sang Topnotcher. Dugang sini, “Dapat may ara ka gid goal kag target, kag indi ka gid magpadala sa mga distractions.”
Nagapadayon subong sa pag-“explore” si Bonifacio kag wala man ginadula ang posibilidad sa pag-trabaho sa iban nga mga pungsod.#
