Gintagaan sang masanag nga kasayuran sang Bombo Abogado nga si Atty. Frances Parcon-Torres ang publiko parte sa mga kaso nga naga-involve sang mga menor de edad, labi na gid ang may kaangtanan sa mga rumble nga nagluntad sa syudad sang Iloilo.
Sa interview sang Bombo Radyo kay Parcon, ginpahayag niya nga ang criminal liability sang kabataan nagadepende sa injuries nga naangkon sang biktima sa insidente.
Ginsaysay man niya nga base sa Republic Act 9344 ukon Juvenile Justice and Welfare Act, ang mga naga-edad 10 tubtub 15 anyos wala sang criminal liability.
Apang kon ang menor de edad naga-edad 15 tubtub wala pa 18 kag may discernment ukon kabalo sa ila ginahimo, pwede sila mapasakaan sang kaso.
Indi man ini dapat gamiton sang kabataan bilang rason para maghimo sang sala kay may ara gihapon sila sang intervention kag pwede ang ginikanan nila ang manabat sa civil aspect.
Suno kay Parcon, isa sa mga rason sang kabataan nga naga-intra sa rumble amo ang kakulangan sang guidance sa panimalay, peer pressure, kag ang misconception sa layi sa RA. 9344.
Paathag ni Parcon, ginapaminsar sang iban nga kabataan nga indi sila makasuhan bisan mag-obra sang sala, gani nagapadayon sila sa indi maayo nga binuhatan.
Ginalauman ni Parcon nga mapasar ang Comprehensive Juvenile Intervention Program upod sa CSWDO agud matapna ang mga insidente kag mabuligan ang kabataan nga magbag-o.
Ginhingyo man niya ang barangay kag mga ginikanan nga buligan ang kabataan sa pagpili sang insakto nga grupo kag pagpahilayo sa kinagamo kag krimen.
