Dakop ang duha ka street-level individuals matapos ang ginpatigayon nga buy-bust operation sang mga kapulisan sa Zone 5, Brgy. Boulevard, Molo, Iloilo City.
Ginkilala ang subjects nga sanday alyas “Roland,” 53 anyos, pamilyado kag si alyas “Ebang,” 50 anyos, pareho nga mga residente sang Zone 5, Brgy. Boulevard, Molo.
Sa interview sang Bombo Radyo kay Police Lieutenant Lloyd Pagulayan, deputy chief of police sang Iloilo City Police Station 4, iya gin pahayag nga naglab-ot tatlo ka semana ang ila pagmonitor sa mga suspects antes ini madakpan.
Isa ka sachet sang ginasuspetsahan nga shabu ang nabakal sa operasyon kag narekober pa ang 3 ka iban nga sachets sang suspected drugs.
Naglab-ot sa kabug-usan nga 4 ka sachet ang nakumpiskar nga may kabug-aton nga ginabulubanta masobra 5 ka gramos kag may standard drug price nga ₱34,000.
Padayon pa ang imbestigyason sang mga kapulisan kung sa diin ginakuha sang mga suspects ang ila supply sang illegal drugs.
Sa subong, yara na sa kustodiya sang ICPS 4 ang mga nadakpan nga suspek kag posible magapangatubang sang kaso nga paglapas sa Republic Act 9165 ukon Comprehensive Dangerous Drugs Act of 2002.
By: 𝑩𝒐𝒎𝒃𝒐 𝑲𝒓𝒚𝒍𝒍𝒆 𝑴𝒆𝒍𝒍𝒊𝒛𝒂
