Gintawag nga isa ka “self-serving statement” ni Retired Police Colonel Uldarico Garbanzos, hepe sang Iloilo City Traffic and Transportation Management Office (ICTTMO), ang reklamo sang isa ka Passenger Assistant Officer halin sa Metro Iloilo Transport Service Cooperative (MITSCOOP).
Ang ini nga reklamo ang may kaangtanan sa pagpabor sang traffic enforcers ang traditional jeepneys kaysa sa modernized jeepneys.
Sa interview sang Bombo Radyo kay Retired Police Colonel Uldarico Garbanzos, iya ginpahayag nga mas maayo nga personal nga magpadulong ang sin-o man nga may reklamo sa ila opisina agud matutukan kag matagan gilayon sang hustisya ukon solusyon ang isyu.
Pahayag pa sini, bukas gid ang opisina sang ICTTMO sa tanan nga reklamo kag luyag nila nga madiretso ini sa ila para masiguro nga mahatagan gilayon sang solusyon ang problema.
Suno kay Garbanzos, may yara sila sang “zero tolerance” batok sa bisan ano nga klase sang korapsyon, pang-abuso, ukon malain nga pamatasan sang ila mga personnel.
Ginpunto man sang natungdan nga wala gid nila gina-consider ang bisan ano nga kaso sang ICTTMO, sa diin nagahatag pa ini sila sang nagakaigo nga mga penalties.
Dugang pa ni Garbanzos, wala gid sila nagapangduha-duha nga magpahalin sang ila mha personnel sa ila mga serbisyo ilabi na kun mapamatud-an nga may mabug-at ini nga sala nga nahimo.
Ginklaro man niya lakip sa mga polisa nga protektahan ang interes sang publiko kag siguruhon nga patas kag husto ang pagpatuman sang mga layi trapiko para sa tanan nga mga motorista mapa-publiko man ukon pribado.
