Nasapwan nga patay ang isa ka lalaki nga pintor subong nga gab-i pasado alas-8:45 sa Brgy. Bongol San Vicente, Guimbal, Iloilo.
Sa interview sang Bombo Radyo kay Police Lieutenant Lario Esposo, officer-in-charge sang Guimbal Municipal Police Station, iya ginpahayag nga nakita sang isa ka mangingisda ang isa ka lawas nga nagalutaw sa baybay sang nasambit nga lugar kag ila gilayon ginkuha kag ginpahigad.
Nakita nga nagabura na ang bibig sang biktima.
Na-identify ang biktima nga si alyas Graciano, 47-anyos, isa ka pintor kag residente sang Brgy. Igcocolo, Guimbal, Iloilo.
Base sa inisyal nga imbestigasyon sang kapulisan, ginpahayag sang iya kaupod nga isa man ka pintor nga nagapaminta sila sa isa ka balay sa Brgy. Santa Rosa-Laguna, Guimbal.
Pagkatapos sang ila obra kainang hapon, upod sila sa pagpauli apang nagpabilin ang biktima sa Guimbal Public Market.
Dugang pa sang iya kaupod nga nakita niya nga nagapangluya na nga daan ang biktima.
Ginhingagaw pa ang madala ang biktima sa ospital apang gindeklarar ini nga dead on arrival.
Padayon pa ang imbestigasyon sang kapulisan agud mahibaluan ang rason sang iya kamatayon.
By: 𝑩𝒐𝒎𝒃𝒐 𝑲𝒓𝒚𝒍𝒍𝒆 𝑴𝒆𝒍𝒍𝒊𝒛𝒂
