Sa tunga sang kontrobersya sa baha nga nakaapekto sa anum ka distrito sa Iloilo City, gin-athag ni Councilor Nene Dela Llana nga wala sang pamolitika sa ginapatigayon nga investigation in aid of legislation sang konseho.
Ginpabutyag niya nga ang tinutuyo sini amo ang transparency kag accountability sang mga ahensya nga may kaangtanan sa proyekto.
Sa interview sang Bombo Radyo, ginpahayag ni Dela Llana nga nagpanawagan siya kay DPWH-Iloilo City District Engineering Office (ICDEO) Officer-in-Charge Roy Pacanan matapos ini wala nagtambong sa Quad Committee hearing sang konseho.
Suno sa iya, padal-an liwat sang imbitasyon ang ICDEO para sa masunod nga hearing bangud importante gid ang ila presensya.
Ginpunto niya nga indi ini pamolitika, kundi sabat sa reklamo sang pumuluyo nga naapektuhan sang baha.
Ginsiling pa ni Dela Llana nga kun indi gid makatambong si Engr. Pacanan, mahimo siya makapadala sang representante sa hearing.
