Nagtakop na ang kampanya sang Gilas Pilipinas sa 2025 FIBA Asia Cup matapos nalutos sa kamot sang two-time defending champion kag powerhouse team nga Australia, 84-60, sa quarterfinal match subong nga gab-i, Agusto 13.
Napaslawan man si Coach Tim Cone kag ang Nationals nga makuha ang target nga gold medal, apang mas maayo ini nga performance ipaanggid sa nagligad nga FIBA Asia Cup kun sa diin nagpang-siyam lamang ang Gilas.
Sa imbukada pa lang nga quarter sa hampang sa King Abdullah Sports City sa Jeddah, Saudi Arabia, gina-uyatan na sang Boomers ang 29-12 nga abanse batok sa Philippine national team.
Nanguna sa players sang Pilipinas batok sa world no. 7 si Kevin Quiambao nga may 17 points kag four rebounds.
Sa pihak nga bahin, si Justin Brownlee nga amo ang nagsalbar sa Gilas kag nagpanguna sa overtime win batok sa Kingdom of Saudi Arabia ang nalimitahan lamang subong sa 10 points, 4 assists, kag 3 rebounds.
Sunod nga makit-an ang Gilas sa 2027 World Cup Qualifiers nga maga-umpisa sa Nobyembre 2025.
Una sini nga atubangon ang Guam sa back-to-back games. Matabo ang first game sa home court sang kasumpong samtang ang ikaduha naman ang patigayunon sa Disyembre 1 diri sa Pilipinas.#
The Scores
Australia 84 – Galloway 15, Foxwell 15, McVeigh 12, Cooks 10, Magnay 10, White 8, Wessels 6, Hickey 5, Bannan 2, Daniels 1, Smith 0, Henshall 0.
Philippines 60 – Quiambao 17, Ramos 15, Brownlee 10, Edu 8, Thompson 5, Tamayo 2, Aguilar 2, Malonzo 1, Newsome 0.
Quarters: 29-12, 48-28, 69-50, 84-60.
