Ginpa-leave anay ang former actress nga si Nadia Montenegro matapos nga nahingadlan sa incident report kaangot sa ginaalegar nga paggamit sang marijuana sa sulod sang building sang Senado sa Pasay City.
Santo ini sa kumpirmasyon sang opisina ni Senator Robin Padilla kun sa diin naga-trabaho si Montenegro bilang political officer.
Sa statement sang opisina, ginsiling man nga antes pa man ang imbestigasyon sang Office of the Sergeant At Arms (OSAA), may yara na sang initial internal investigation ang office ni Senator Padilla.
Ginpahayag man nga ginhatagan si Montenegro sang lima ka adlaw ukon tubtub sa Agusto 18 agud nga makapasa ini sang written explanation kaangot sa pagkadalahig sang iya nga pangalan.
“On August 13, 2025, even before the investigation conducted by the Office of the Sergeant At Arms (OSAA), the office commenced an initial internal investigation regarding media reports allegedly linking Ms. Nadia Montenegro. On the same day, she was directed to take a leave of absence, effective immediately,” kabahin sang official statement.
Nahibaluan nga base sa incident report nga napetsahan sang Agusto 13, ginplastar sang security personnel nga si Victor Patelo nga may duha ka insidente nga may napanimahuan nga indi kinaandan sa isa ka area sa Senate building.
Una amo ang sa ikaduha nga semana sang Hulyo 2025 kun sa diin may nag-report nga isa ka male staff member nga maisog nga baho, apang wala man sang nakit-an nga nagpanigarilyo.
Ikaduha amo ang Agusto 12 kun sa diin nagpalapit ang staff ni Senator Panfilo Lacson sa amo gihapon nga security personnel sa 5th floor, kag nagpanugid nga may indi kinaandan nga baho nga halin sa comfort room sang mga babaye malapit sa extension offices sang mga senador.
Ginpahayag nga daw marijuana ang baho kag ang tawo lamang sa area sa amo nga tion amo si Nadia.
Suno sa security personnel, ginmunuhan sini si Nadia sang naglabay ini sa iya pwesto, apang nagpanginwala ang former actress nga nagpanigarilyo ini ukon naggamit sang marijuana. Gin-ako sini nga may dala siya nga vape sa iya bag nga amo ang posible ang ginhalinan sang baho.
May ginpasa naman nga investigation report sa Office of the Senate President (OSP) kasunod sang amo nga insidente.#
