Sa tunga sang pagtaas sang presyo sang palay sa iban nga rehiyon matapos ang ginpatuman nga import ban, ginpahayag sang Department of Agriculture sa Western Visayas nga diri sa aton, nagataas man ang farm gate price bisan gamay pa lang ang na-harvest sa mga kaumahan.
Sa interview sang Bombo Radyo kay Maria Teresa T. Solis, OIC-RTD for Operations and Extension sang Department of Agriculture–Western Visayas, ginpahayag nga sa subong gamay pa lang nga porsyento sang palay ang na-harvest sa mga uma sa rehiyon.
Base sa ila monitoring, ang presyo sang wet palay nagasugod sa 12 pesos tubtob 14 pesos kada kilo, samtang ang dry palay nagalab-ot sa 14 tubtob 20 pesos. Ginpabutyag man nga mas mataas ang presyo sang palay nga ginabakal sang National Food Authority (NFA), nga nagalab-ot sa 22 tubtob 24 pesos kada kilo.
Gintalana sang ahensya nga mataas gid ang farm gate price sa subong, kag ginpasalamatan ang desisyon sang Presidente Ferdinand Marcos Jr. sa pagsuspende sang importasyon sang bugas sulod sang duha ka bulan. Ginpahayag nga ini nga tikang dako nga bulig sa mga mangunguma sa rehiyon.
Ginalantaw man sang ahensya nga ang kontrolado nga importasyon kag pagtaas sang taripa sa bugas halin sa guwa posible makahatag sang dugang nga proteksyon sa lokal nga produksyon.
