Ginkumpirma sang Department of Foreign Affairs (DFA) nga may mga Pinoy nga nalakip sa casualties sang naaksidente ang isa ka tour bus sa Upstate New York.
Sa amo nga insidente, lima ang kumpirmado nga patay kag madamo ang napilasan apang wala pa ginpaguwa ang ila identity kag mga nationality.
Sa statement sang DFA, gingamit ang impormasyon nagikan sa local police. Ginpasiguro man nga naga-monitor ang Philippine Consulate in New York sa mga development.
“New York State Police have reported that several of the casualties are Filipino nationals,” suno sa DFA.
Wala ginpatpat kun ano nga mga injuries ukon ano ang medical status sang apektado nga mga Pilipino.
“Our thoughts and prayers go out to those affected by this incident. Respecting the privacy of the individuals, authorities have not released further information and instead relayed that they will be reaching out to the families of the victims directly,” pahayag pa sang DFA.
Nahibaluan nga pabalik sa New York City ang bus kag halin sa Niagara Falls sang nag-crash ini sa Interstate 90 sa Pembroke. Ginpahayag nga nadulaan sang control ang driver, nagligid sang pila ka beses, antes ini nagdulog sa kilid sang freeway.
51 ang mga pasahero nga sakay sini. Pila sa mga nasamaran nga pasahero ang gin-airlift gid kag gindala sa nanuhay-tuhay nga mga ospital para sa treatment.
Una na nga ginpahayag nga Asians ang kadam-an sa mga pasahero lakip ang mga Pilipino, Chinese, kag Indians.#
