Patay ang isa ka lalaki matapos siya makuryente samtang nagapangisda gamit ang improvised nga electric fishing device sa NIA Main Canal, Purok Sarah 2, Barangay Sajaneba, Sto. Niño, South Cotabato sang Sabado, Agosto 23, 2025.
Ginkilala sang Norala PNP ang biktima nga si Glenn Beltran, 46 anyos, residente sang amo nga barangay.
Suno sa imbestigasyon sang Sto. Niño Municipal Police Station, naghalin ang biktima sa ila balay pasado alas-8:00 sang aga agud magpangisda, pero samtang ara siya sa tubig, aksidente siya nga nakuryente bangud sang iya gin-gamit nga improvised fishing device.
Sang alas-10:00 sang aga, nakita si Beltran nga nagalutaw sa kanal sang isa ka concerned citizen.
Gilayon siya gindala sa Norala District Hospital, pero gindeklarar sang doktor nga dead on arrival.
Suno sa imbestigasyon sang kapulisan, wala sang nakita nga pilas ukon palatandaan sang foul play sa lawas sang biktima, pero ginpaidalom gihapon siya sa post-mortem examination.
